DO YOU SPEAK ENGLISH – احمد جمعة

من شوية جالي تليفون من امريكا وكان كل المحادثة بالانجليزي ، وانا زي مانتو عارفين (متمكن فالفرنساوي ) 🙂 يعني الحمد لله كان كل ردودي (الف الف مبروك ، وربنا يتمم بخير ) 🙂 فالحقيقة هو كان تليفون شغل مهم جدا والحمد لله قدرت اعدي الاتصال كلة وفهمت اكتر من 3/4 الحوار بشكل معقول وكمان قدرت ارد واستغل كل كلمة اعرفها ممكن ارد بيها او حتي اوصل المعني الي عايزة (مرونة) وقدرت بفضل الله اتفاوض بشكل معقول مع الطرف التاني . الي ولا انا شايفة ولا اعرفة ان كان راجل من ست ولا انا اصلا عارف ان كان بني ادم ولا انسان آلي بيكلمني 🙂

DO YOU SPEAK ENGLISH احمد جمعة

بس افتكر من حوالي 5 او 6 سنين وانا في بداية حياتي كنت لسة بدور علي شغل وكنت ببعت ال cv بتاعي لشركات كتير ، وفي يوم من الايام لاقيت التليفون بيرن PRIVET NUMBER ورديت ولاقيت صوت كانة answer MACHINE بيكلمني بالانجليزي وانا مش فاهم ولا كلمة لحد مابعد حوالي دقيقتين فهمت انة بيسئلني انا احمد جمعة ولا لأ 🙂 المهم قالي اني كنت مقدم علي شغلانة وادارة الشركة بتكلمني من هولندا وانهم هايعملو معايا انترفيو فالتليفون دلوقتي …. ارتبكت كتييير اوي و قولتلة اوك بس ثواني هاجيب صديقي شاطر فالانجليزي عشان يترجملي ، وبالفعل ناديت صاحبي وبدأ يكلم معاهم وخلال دقيقتين لاقيته قفل التليفون وقالي انهم قالولة ” كنا مفكرين احمد بيعرف يتكلم انجليزي كويس ولكن عشان جاب مترجم يبقي مش مناسب للشغلانة وشكرا” وقفلوا وضاعات الشغلانة

علما باني كنت وقتها شاطر فالانجليزي اكتر من دلوقتي لاني كنت لسة حاصل علي التويفل او كنت بزاكرة مش فاكر وكمان كان شغلي كلة مع التكنولوجيا ودراستي في تكنولوجيا المعلومات كلها بالانجليزي ، يعني كنت اقدر اكمل المكالمة بنفسي واعدي الانترفيو بنفسي من غير وسيط وبالتالي مكنتش ضيعت الفرصة من ايدي، علي عكس دلوقتي خالص نسيت التويفل تقريبا ومش بمارس الانجليزي ولا حتي بتفرج علي افلام بالانجليزي.

المهم فالموضوع

زمان ضيعت فرصة بسبب الارتباك ، رغم الامكانيات الكبيرة فاللغة

دلوقتي نجحت بنسبة كبيرة بسبب الثقة ، رغم الامكانيات القليلة فاللغة

 

م الاخر

المهارة مش كل حاجة ، لانك لو مش عندك الثقة ،هاتبقي زي السيارة الي فيها بنزين بس مفيهاش موتور يحركها !

ولو مش عندك المرونة هاتبقي زي السيارة الي مفيهاش دركسوين !

 

#ثق_بالله

#ثق_بنفسك

#آمن_بقدراتك

#كن_مرن

#احمد_جمعة

Share This:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *