تقييم حلقة اللايف كوتش مع مايكل راشد علي قناة MBC مصر

مايكل عمل الي عليه في الحلقة ولكن بالظبت المذيع كان متضامن شوية مع الدكتور محمد المهدي ودة نظرا لانه ضيف دايم في برنامجة وبيجي كتير مع د مبروك عطية، وطبعا كان واضح جدا من الحلقة ان ولا الاعلامي ولا الدكتور المهدي كان عندهم دراية بطبيعة شغل اللايف كوتش وكل همهم يقارنوه بالطب النفسي وطبعا مفيش وجة مقارنة بينهم ولو كانو عايزين يقارنو كان ممكن يقارنو بالاخصائي النفسي مش الطبيب النفسي ويمكن دة اقرب حاجة ممكن تبقي قريبة من الكوتش، وحتي الاخصائي النفسي مفيش تضارب معاه والكوتش، وكمان الكوتش مالوش اي دور طبي مع العملاء بالعكس دايما من اول مالعميل بيبدأ يتواصل معانا بنسأل عن طبيعة مشكلتة واذا كانت تتعارض مع طبيعة عمل الكوتش بيتم توجيهة للطبيب النفسي فوراً لان الكوتش شغلة بعيد عن الامراض والاضطرابات نهائياً.

والشورى والتيسير في حد ذاتها طول عمرها موجودة وليها دور فعال كبير في مختلف مجالات الحياة والشغل ..
اما بخصوص هجوم د المهدي علي د الفقي واهانتة لاهميتة ودة لانة عارف انه محدش هايرد علية وكان في انكار منة لاهمية ماقدمة د الفقي للعالم من اراء وتوجهات وارشادات لتحسين حياتهم ..ودة اكدلي اكتر ان مشكلة د المهدي وغيرة في السبوبة واحساسهم ان مصدر رزقهم بيتهدد بااللايف كوتش، علما بان انا شخصيا كتير ناس بتجيلي استشارات بترشيح من اطباء نفسين وكتير ناس جاتلي بترشيح من طبيب نفسي لعمل جلساتباساليب NLP وال Hypnosis
وتقريبا كل دوراتي الي عملتها في التنويم الايحائي والبرمجة العصبية كان بيشارك فيها اما اطباء نفسييين او باحثيين في علم النفس وبيدرسو تأثير هذه التقنيات في العلاج وماشاء الله ولا عمري شفت حد بيتهكم زي دالمهدي فالحلقة دي، علما بان الكثير من الاطباء النفسيين بيطلعو في لقاءات تليفزيونية مشتركة مع لايف كوتش مشاهير اكتر من مايكل ولكن مبيقعدوش يهاجموهم ولا بيتعارضو معاهم بل بالعكس بيبقي في تأييد وطبعا بنبقي فاهمين وجود العلاقات والمصالح المشتركة بينهم او توجة القناة او ان الكوتش المشهور طالع في البرنامج بفلوسة احياناً او توجه القناة انة يحافظ علي العلاقة مع الضيفين عشان بيجيبو للقناه مشاهدات كتير
زمان في ناس تفرغت لتحريم البرمجة العصبية والتنمية البشرية في العموم ولما تابعت الناس دي حرفياً اكتشفت انهم مكلفوش خاطرهم بحضور ولو ندوة مجانية واكتفو بالقشور الي بيشوفوها ع النت مثلا، ومش عايز اقولكم ان واحد من الي هاجمو البرمجة فترة طويلة عشان يتشهر بعد فترة من الزمن طلع علي التليفزيون في حلقة علي انه خبير برمجة لغوية عصبية وقعد يتكلم علي فايدتها بعد ماكان الاول بيهاجم …

بالاضافة كمان خلينا نتفق ان المجال بتاع التدريب والكوتشينج بصفة عامة في ناس كتيييير اوي دخلت فيه بدون اي مهنية ولا اخلاق لاغراض اخري زي السبوبة او الشهرة او عشان يعملو حجات لا اخلاقية وساهم في دة مراكز بير سلم ظهرت من فترة وكانو يفتقرون الي اي معايير قيمة للتدريب وكانو بينشقو من جمعيات خيرية وحجات كدة ويستغلو الاسامي الرنانة زي نقابة واتحاد ومجلس وبورد …الخ لدرجة انة في مرة احدهم عمل دورة tot ب 50 جنية في اسبوع وغيرة وكان بيخرج شهريا اكتر من 500 واحد في الاسكندرية بس وطبعا لا يفقهو شئ ولان طبعا العلم مش بيتقاس بقيمتة المادية لكن لما تابعت المحتوي اللي بياخدوه لاقيت تقريبا أ ب الي ممكن اي حد متخصص يدرسة عشان يحترف فعلا في المجال دة يعني حط اي حاجة هايفة بشكل دمة خفيف ووهم الناس انهم بقو مدربين ب 50 جنية وشالو شهادة معمولة في المنشية متكلفتش 3 جنية ورق وطباعة ، ونفس الناس دي باه تيجي قنوات تليفزيونية زي الصحة والجمال والحدث اليوم و…. غيرها كتير بتبيع الحلقات بتاعتها للي يشتري فيطلعو ع التليفزيون ويزيدو في تصديق نفسهم اكتر واكتر، والناس دي طلعت بالشكل دة وعايزين يشتغلو وشوهو صورة مجال التدريب والكوتشينج بصفة عامة لانهم اخطئو كتير جدا في حق العملاء والمجتمع ككل والحمد لله دلوقتي الموضوع قل لان السوق المصري زكي وبيعرف يغربل الوحش .

اما بخصوص ال ICF او اي جهة اخري بتعتمد اللايف كوتش، فخليني اعرفكم ان ICF ماهي الا مركز تدريب زية زي اي مركز تدريب في اي مكان بالعالم ولكن المركز دة مشهور شوية بانه بيهتم بالمجال بتاع الكوتشينج ، لكن شهادات ICF او غيرها لا تضيف اي ميزة اضافية لمن يحملها عن من يحمل اي شهادة كوتش ا خري، علماً بأن ICF تقدم اعتمادات شهاداتها للمراكز والمدربين بالتعاقد وبدفع مصروفات محددة بموجبها يتم عمل الشهادات .. يعني جهة ربحية لا اكثر ولا اقل ولكنها تهتم بهذا المجال وتقدم بحوث فيه.
من الاخر اياً كان هاتدرس ولا هاتاخد الشهادة معتمدة من فين هو المناهج واحدة لانها عبارة عن اساليب وطرق تفيد في خدمة العميل وانا عن نفسي كأحمد دايماً في اول slide في اي من دورات اللايف كوتشينج بنقدم فيها نصايح كتير منها ” انت لست طبيب نفسي” ، ” لاتنصح احد بالتوقف عن الدواء” ، ” اذا كان عندك مشكلة اذهب انت للطبيب” ، … وغيرها وفي ضمن الدراسة بنعرف الكوتش الجديد مين الحالات الي ممكن يستقبلها والي بتكون كلها حالات غير مرضية وليس لها اي علاقة بالمرض يعني شخص محتار يختار اي كلية او حد عندة خلاف مع اصدقاءة او محتاج توجية لاتخا قرار في حياتة ..

من الاخر مجال التدريب والكوتشينج مجال مش سهل الدخول فية ولو دخلت مش هاتعرف تستمر فيه الا لو كان عندك رصيد من الخبرات كبير جداً ومتجددة دائماً .. تقدر تفيد بيه الناس وتساعدهم

انا اقدم #كل_الدعم_لمايكل_راشد ولكن بشكل اكبر #اللايف_كوتش_مالوش_علاقة_بالطب_النفسي انما هو سلسلة من خبرات الحياة التي تساعد الافراد لتحسين حياتهم وترتيب اولوياتهم ….

ومن موقعي في مؤسسة ابني نفسك للتنمية اقدم دعوة مجانية لاي طبيب نفسي لاي لقاء للنقاش حول اللايف كوتش واثبات عدم وجود اي علاقة بينه وبين الطب النفسي ..

مع كل التقدير
المدرب #احمد_جمعة
01283014442

Share This:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *