إزاي ترتبي يومك في رمضان !
اول حاجة كل سنة وانتي طيبة ورمضان كريم عليكي وعلي اسرتك يا “حواء” خليني افكرك بأن رمضان فالاصل شهر للعبادة والتركيز في كل عمل نافع عشان ربنا يباركلك في الشهر العظيم دة.
وكتير مننا بيبقي عندة مشكلة فالتوفيق بين العبادات والاعمال المنزلية ومزاكرة الابناء والعزومات الرمضانية وكمان المسلسلات والبرامج الرمضانية الي بنستناها من سنة للسنة… خليني في المقالة دي اساعدك بشوية نصايح تحطك علي الطريق السليم لادارة وقتك خلال شهر رمضان.
قبل اي حاجة خليكي متأكده ان ادارة وقتك ويومك مابينفعش حد يعملها غيرك لانها لازم تكون مناسبة لظروفك انتي وطبيعة حياتك انتي.
* الخطوة الاولى حددي انتي عايزة اية:
لازم تبقي عارفه ان حياتك مش بس حاجة واحدة؛ انما هي مجموعة من الزوايا والاركان المختلفة الي بيسموها كتير من العلماء “عجلة الحياة” او “اركان الحياة المتزنة” الي هم بالتحديد: علاقتك بربنا – وعلاقتك بالناس من حواليكي و تطوير ذاتك وثقافتك والمهنة والمال والصحة …
كل حاجة في دول ماتقلش اهمية عن التانيه يعني ماينفعش مثلا تركزي انك تنجحي في الزاوية الماديه وتطنشي الباقيين لان بعد فترة هاتلاقي عندك مشاكل في باقي الاركان مش هاتخليكي مرتاحة ابداً.
فإنتي كدة لازم تقعدي من دلوقتي تحددي انتي عايزة تنجزي ايه من اهداف في كل زاوية وركن في حياتك، ودي مجموعه اهداف مقترحة ممكن تعملي زيها خلال شهر رمضان:
– الركن الروحاني: اختم القرآن وانتظم في الصلاه واصلي التراويح
– الركن العائلي والاجتماعي: اعزم عائلتي ونسايبي مرتين خلال الشهر و اخلي اولادي ينتظمو فالصلاه واني اقبل عزومات الاقارب بمعدل مرة اسبوعياً
– الركن الشخصي والثقافي: قراءة كتاب عن السيرة النبوية وحضور دورة تدريبية واحدة خلال شهر رمضان.
– الركن المهني: احافظ علي عملي والتزم بالتعليمات واتنافس بشرف
– الركن الصحي: احافظ علي تمرين رياضي كل يوم نص ساعه وماكلش كتير فالفطار والسحور، واقلل السكريات.
بعد ماتحددي اهدافك انتي كدة بقيتي جاهزة للخطوة الثاني.
* الخطوة التانية رتبي اولوياتك:
اهدافك كتير ومش عارفه هاتعمليها كلها امتة وازاي ، ماتقلقيش لان ا لحل في ترتيب الاولويات ، ودي بتحصل من خلال حاجة اسمها مصفوفة الاولويات الي بتقسم فيها الانشطة اليومية بتاعتك لـ 4 انواع الي هم: 1- المهم والعاجل 2-الغير مهم وعاجل 3- المهم وغير عاجل 4- الغير مهم وغير عاجل، وخليني اشرحلك الفرق مابينهم:
1-المهم وعاجل: دي الحاجات الي ماينفعش ماتعملهاش ولا ينفع تاخرها زي مثلا الصلاه علي وقتها او الطبخ قبل المغرب
2- الغير مهم وعاجل: ودي الحجات الي مش مهمة بالنسبالك بس مستعجلة لازم تتعمل زي مثلا حد وقفك فالشارع يسلم عليكي دة مش مهم ولا مفيد لكن ماينفعش تأجليه
3-المهم والغير عاجل: دي الحجات المهمة بس الي ممكن تأجليها زي مثلا زيارة عائلية ممكن تتأجل او قراءة القرآن في وقت قابل للتعديل
4- الغير مهم والغير عاجل: اما دي فالمقصود بيها الحجات الي مش مفيدة ومش مستعجلة زي مثلا تصفح الانترنت بدون هدف وقعدات الغيبة والنميمة ومشاهدة مسلسل …
طبعاً يا “حواء” انتي كدة فهمت بسهولة انك لو رتبت اولوياتك هاتعمل الحاجات بالتريب دة ومش هاتستهلك وقتك في حجات مش مهمة ومش عاجلة وتعطلي حجات مهمة وعاجلة مثلا ، يعني كل حاجة ليها ترتيب لازم تلتزم بيه
* الخطوة التالتة اتعاملي مع لصوص الوقت:
ست الكل”حواء” وقتك دة هو حياتك يعني لازم تحافظي علية وتقاطعي كل الحجات الي بتسرق وقتك زي مثلا الموبايل والتليفزيون او جلسات الغيبة والنميمة، وطبعا مش كل الي بيمسك موبايل ولا بيتفرج علي تليفزيون يبقي بيضيع وقت يعني مثلا لو انا شغلي علي الانترنت وبفتحة من الموبايل ميبقاش هنا الموبايل بيسرق وقتي لكن انا بقصد بالظبت الحجات الي بتستهلك منك وقت ومش بتستفادي منها حاجة او بتضرك اكتر ماتفيدك.
= طب ازاي اقاطع الحجات الي بتسرق الوقت دي؟
دي طريقة بسيطة خالص ممكن تجربيها: مبدئيا في الفترة الاولي ماتقاطعهاش خالص لو كنتي مدمناها يعني ابدأي بحاجة بسيطة زي انك تحددي وقت للحاجة دي: فمثلاً ساعه واحدة يومياً للموبايل سواء استهلكتيها مرة واحدة او علي مرات متعددة المهم الاجمالي مايعديش 60 دقيقة.
الخطوة الرابعة To Do List :
كل يوم باليل تعملي To Do List قايمة مهام بالحجات الي عليكي تعملها بكرة ، وتصحي الصبح تمشي علي القايمة دي لحد نهاية اليوم وفي اخر اليوم قيمي اليوم وقد اية التزمتي بالقايمة دي، وبعد التقييم دة هاتعمل جدول تاني يوم وتكرر العملية الي فاتت .
مثال عملي: صليتي التراويح وخلصتي المسلسل الي بتتابعية تعالي باه قبل ماتنامي باليل وابدأي اكتبي To Do List الحجات الي هاتعمليها من اول ماتصحي زي: الساعه 8 الصبح هاروح الشغل – الساعه 2 الظهر هابدأ في الطبيخ – الساعه 7.30 هاروح النادي للتمرين – الساعه 9 هاقرأ في المصحف جزء – … الخ وانتي ماشية لحد ماتخلصي كل الحجات الي انت عارفة انك هاتعمليها تاني يوم بإذن الله
* الخطوة الخامسة ماتزنقيش نفسك:
ودي من الحجات المهمة جداً انك تراعي فترات زمنية كافية لكل نشاط بتعملية، يعني مثلا الحاجة الي بتستاهل ساعه اديها ساعه وربع تحسباً للطوارئ والحاجة الي تساوي 5 ساعات اديها 6 ساعات يمكن يحصل اي مفاجآت تعطلك.
واخيراً عزيزتي “حواء” الاهم من كل الخطوات الي فاتت هو انك فعلا تلتزمي بخطة عملية لتنظيم يومك وماتسيبيش حياتك ماشية بالبركة عشان شهر رمضان دة مرة واحدة فالسنة وكل عمل مفيد بتعملية فيه بيبقي رصيد حسنات عظيم عند ربنا وبينفعك بعد كدة في كل امورك فالدنيا والاخرة، واتأكدي ان الوقت دة محدود ومسيرة هايخلص ولو ضيعتيه في الفاضي ييبقي ماتلوميش إلا نفسك.
اتمنالك يوم جميل في رمضان الكريم
المدرب #احمد_جمعة
www.mrAhmedGomaa.com
شرفيني بزيارة الموقع
