ازاي ترتب يومك ومحدش يلومك؟

ازاي ترتب يومك ومحدش يلومك؟
كتير من الناس يومها ماشي بالبركة وزي ماتيجي ، او حاطين نظام مش مناسب لظروف حياتهم فبيضغطهم ويتعبهم ، اديك مثال عليا انا شخصياً من كام سنة كدة كنت رتبت جدول محاضراتي بشكل غشيم شوية يعني مثلا خليت محاضرة في الاسكندرية تنتهي الساعه 5 ويكون عندي محاضرة في القاهرة الساعه 7 بالظبت ومحاضرة في القاهرة مثلا تنتهي الساعه 2 الظهر وتبدأ واحدة تانية فالاسكندرية الساعه 4 بالظبت …
صحيح قدرت الي حد ما التزم بالجدول ولكن طبعا دة استهلكني جسديا وذهنياً وماديا جدا ، يعني مثلا كنت بضطر افضل مركز جدا ومنتبه عشان ماطولش في محاضرة والخبط الجدول، او مثلا كنت بضطر اجري علي الطريق الصحراوي وانا سايق لدرجة اني فاكر ان في يوم من الايام دي غيرت فردتين كاوتش علي الطريق من كتر درجة الحرارة في الجو مع سرعه وبدون توقف لحد مالكاوتش اتقطع والحمد لله ربنا ستر ..

طب مانت الي غلطت يابو حميد عشان زنقت نفسك !
ايوة صح فعلا معاك حق انا غلطت اني مراعيتش الظروف الي ممكن تطرأ عليا وحطيت جدول صعب تنفيذه ولو نفذته خسايرة هاتكون كتير برضو وهاتضيع طعم مكسبة ومتعتة، يعني ببساطة كسبت قد ماخسرت سواء ماديا او نفسيا او معنوياً.. يعني صفر مكسب في الاخر.

ومن الموضوع دة اتعلمت شوية حجات ممكن تساعدك في ترتيب يومك بشكل لذيذ وهي:

• اول حاجة خليك متأكد ان ادارة وقتك ويومك مابينفعش حد يعملها غيرك لانها لازم تكون مناسبة لظروفك انت وطبيعة حياتك انت، زي ماكنا زمان مثلا نجيب كراسة الاول ويكون فيها جدول مزاكرة وناخدة ونمشي علية فترة وفالاخر مابنتفوقش يعني زي ما الجدول بيقول ودة طبعاً لان طبيعة حياة وظروف الي حط الجدول ماتنطبقش علي ظروفي انا الشخصية يعني الي حط الجدول بيحب الكيميا وانا مبحبهاش فهو زود فيها فجدولة وانا لما استمريت ع الجدول بتاعه محققتش نتيجة زية بالظبت.
• تاني حاجة عشان تنظم يومك صح هي انك لازم تقاطع كل الحجات الي بتسرق وقتك زي مثلا الموبايل والتليفزيون او القعدة علي القهوة من غير هدف، وطبعا مش كل الي بيمسك موبايل ولا بيتفرج علي تليفزيون يبقي بيضيع وقت يعني مثلا لو انا شغلي علي الانترنت وبفتحة من الموبايل ميبقاش هنا الموبايل بيسرق وقتي لكن انا بقصد بالظبت الحجات الي بتستهلك منك وقت ومش بتستفاد منها حاجة او بتضرك اكتر ماتفيدك.
  طب ازاي اقاطع الحجات الي بتسرق الوقت دي؟ بسيطة خالص مبدئيا في الفترة الاولي ماتقاطعهاش خالص لو كنت مدمنها يعني ابدأ بحاجة بسيطة زي انك تحدد وقت للحاجة دي زي مثلا حدد يومياً ساعة موبايل سواء استهلكتها مرة واحدة او علي مرات متعددة المهم الاجمالي مايعديش 60 دقيقة، وطبعاً عشان تلتزم بدة محتاج تفعل عندك العقاب لو مالتزمتش زي تحرم نفسك من حاجة حلوة كنت هاتعملها ، وكمان تكافئ نفسك لو التزمت زي مثلا تاكل شيكولاتة لو التزمت بالوقت دة .
• تالت حاجة باه عشان تكمل نظام يومك هي انك ترتب اولوياتك حسب ظروفك انت ، ودي بتحصل من خلال حاجة اسمها مصفوفة الاولويات الي بتقسم فيها الانشطة اليومية بتاعتك لـ 4 انواع الي هم: 1- المهم والعاجل 2-الغير مهم وعاجل 3- المهم وغير عاجل 4- الغير مهم وغير عاجل، وخليني اشرحلك الفرق مابينهم:
  1-المهم وعاجل: دي الحاجات الي ماينفعش ماتعملهاش ولا ينفع تاخرها زي مثلا الطوارئ الطبية او المزاكرة ليله الامتحان
  2- الغير مهم وعاجل: ودي الحجات الي مش مهمة بالنسبالك بس مستعجلة لازم تتعمل زي مثلا حد وقفك فالشارع يسلم عليك دة مش مهم ولا مفيد لكن ماينفعش تأجلة
  3-المهم والغير عاجل: دي الحجات المهمة بس الي ممكن تأجلها زي مثلا المزاكرة اول التيرم او الزيارات العائلية
  4- الغير مهم والغير عاجل: اما دي فالمقصود بيها الحجات الي مش مفيدة ومش مستعجلة زي مثلا تصفح الانترنت بدون هدف وقعدات الغيبة والنميمة …

طبعاً انت كدة فهمت بسهولة ان لو رتبت اولوياتك هاتعمل الحاجات بالتريب دة ومش هاتستهلك وقتك في حجات مش مهمة ومش عاجلة وتعطل حجات مهمة وعاجلة مثلا ، يعني كل حاجة ليها ترتيب لازم تلتزم بيه

• رابع خطوة عشان تنظم يومك هي كل يوم باليل تعمل قايمة بالحجات الي عليك تعملها بكرة ، وتصحي الصبح تمشي علي القايمة دي لحد نهاية اليوم وفالاخر قيم اليوم وقد اية التزمت بالقايمة دي وعاقب نفسك وكافئ نفسك زي ماتكلمنا قبل كدة، وبعد التقييم دة هاتعمل جدول تاني يوم وتكرر العملية الي فاتت .
• خامس حاجة لتنظيم يومك ودي من الحجات المهمة جداً انك ماتزنقش نفسك وتراعي فترات زمنية كافية لكل نشاط بتعملة وماتكررش غلطتي وتزنق نفسك وتخسر اكتر ماتكسب، يعني مثلا الحاجة الي بتستاهل ساعه اديها ساعه وربع تحسباً للطوارئ والحاجة الي تساوي 5 ساعات اديها 6 ساعات يمكن يحصل اي مفاجآت تعطلك

الاهم من كل الخطوات الي فاتت هو انك فعلا تلتزم بخطة عملية لتنظيم يومك وماتسيبش حياتك ماشية بالبركة عشان الوقت دة محدود ومسيرة هايخلص ولو ضيعته في الفاضي ييبقي ماتلومش الا نفسك.

واستني مقالات تانية هابقي اكلمك فيها ازاي تخلع من صاحبك الكاك وازاي تتعامل مع الطوارئ الي بتاكل وقتك..

اتمنالك يوم جميل
المدرب #احمد_جمعة
للاطلاع علي المزيد من المقالات، شرفني بزيارة الموقع: www.mrAhmedGomaa.com
لو عجبك المقال ماتنساش Share – Like – Comment