ازاي اتخلص من التسرع في قراراتي 10 خطوات؟!
خليني احكيلك شويه قصص حصلتلي ونتعلم منها قواعد عمليه للتخلص من التسرع في اتخاذ القرارات…
” في مره كنت في دبي و بحجز طياره علي ابلكيشن شركة طيران عشان ارجع لمصر قبل العيد وكله تمام اختارت كل حاجه وكان تكلفه التذكره تقريبا 4000 جنيه وقتها وجيت عند خطوة الدفع واكتشفت ان كارت البنك مكانش فيه رصيد كافي والابلكيشن كتر الف خيره 🤭اداني مهله 60 دقيقه اغير طريقه الدفع او حتي ازود رصيد الكارت الي بدفع بيه، المهم نزلت بسرعه وقتها وقعدت ادور علي ماكينه ATM بتعمل ايداع واركب تاكسيات غاليه وفي الاخر ملاقيتش ولا ماكينه وكنت وقتها دفعت حوالي 1000 جنيه بالمصري تاكسيات في عمليه البحث عن ATM وفالاخر استسلمت وضاعت الفرصه😢، وتاني يوم جهزت الرصيد فالكارت ودخلت اعمل حجز لاقيت
نفس التذكره في نفس الرحلة بقت بسعر تقويبا 9000 جنيه لان كان العيد قرب ووقتها خوفت لا الاسعار تغلي تاني لان العيد قرب والاسعار بتغلي كده كده ووقتها اضطريت اشتري بالسعر ده وبقيت عندي شعور بالفرحة اني لحقت قبل الغلاء 🤓، بعد كام يوم من حجزي دخلت اشوف الاسعار بقت ايه عشان استمتع بانتصاري لاقيت سعر نفس التذكره في نفس الوحله نزل وبقي حالي 5000 جنيه بس 🤭 “
- من القصه الهذليه دي احب اقولك الدرس الاول #جهز_نفسك_للتنفيذ يعني ماتغلطش غلطتي وقبل ماتاخد القرار اسأل نفسك عن مقدرتك لتنفيذ القرار زي مثلا معاك تكلفته او وقته مناسب ليك..الخ
- ام الدرس التاني #استغل_وقت_القرار_جيداً او ببساطه ماتضيعش وقت كتير في صنع قرارك عشان الظروف والمعلومات بتتغير اسرع مما تتخيل.
“في مره وانا شاب ايام الجامعه كنت ماشي في شارع لاقيت محل عامل عرض علي تيشرتات ، وكان وقتها الفرحة مش سيعاني اني لاقيت التيشرتات الي محتاجها وباسعار كويسه🤑 وبالفعل دخلت المحل واشتريت 5 الوان منه ودفعت كل الفلوس الي في جيبي ومشيت بكل فرحة وسعاده🥳
بعد شويه جالي اتصال والدي بيسالني عملت ايه في المشوار الي باعتك ليه عشان تدفع الفلوس؛؛ 🤪وفي اللحظه دي بالتحديد افتكرت اني دفعت فلوس مش بتاعتي ونسيت اصلا اني كنت رايح لهدف محدد وطبعا كانت مشكله اني مش هاعرف ارجع التيشرتات ولا هاعرف اسد الفلوس….”
- طبعا واضح من قصتي اني من مشاعري العاليه كانت سبب في نسياني الهدف بتاعي الاساسي ، وده كان تالت درس احب اعلمهولك #ماتخليش_مشاعرك_تغلبك وممكن تراجع مقالاتي السابقه عن التحكم في المشاعر والانفعالات
” في مره كنت في مول كبير ونادو في الميكروفونات عن عرض حصري لمده 10 دقايق علي فواحات السيارات تشتري واحده وتاخد التانيه مجانا وكان سعر العرض تقريبا 20 جنيه وقتها؛
المهم كل الناس بم فيهم انا اول ماسمعنا العرض جرينا زي النمل لما بيلاقي حته سكر يتلم عليها 🐜 وصلنا عند العرض وكان عباره عن باسكت حديد مليان فواحات بروايح مختلفه ومان فيه حوالي 100 قطعه وكان البشر حوالي 300 شخص؛ وكان المحظوظين الي وصلو الاول قدر كل واحد منهم يشيل كميه كبيره من الفواحات ويشم الي ميعجبوش يرجعه تاني وياخد الي عجبه… المهم قررت اني استعوض ربنا ومشتريش العرض ده؛ ولكن قررت اروح قسم اكسسوارات السيارات في المول عشان اشوف اي فواحة تانيه وخلاص وهناك كانت المفاجأه 🤩 ان الرفوف كلها كانت مليانه آلاف القطع من نفس الفواحة الي في العرض وكان سعر القطعه 10 جنيه يعني الاتنين ب 20 جنيه وده معناه ان اصلا مكانش في اي عروض 🤬”
- وده كان رابع درس احب اعلمهولك #لاتنخدع_بالعروض_اللحظيه_تحقق_منها_اولاً لان غالبا بتكون معظم العروض دي هدفها الخداع وتحريك مشاعرك.
“في مره وانا صغير حوالي 13 سنه كنت ماشي في شارع في وسط البلد وكان في بياعين عاملين مزاد علي حجات زي اجهزه كهربائية وطبعاً انا معرفش ان المزادات دي بتبقى كلها ناس تبع البياع بيعلو السعر عشان الزبون اللي زيي ينخدع ويشتري🫣
وقفت في المزاد وعامل نفسي شاطر وعميق والراجل طلع اباجوره وقعد يقول ب 10 مين يزود وبدأ العصابه يزودو باه الي يقول 11 والي يقول 12 وده خلاها تحلو في عيني وقولت 15 وهنا كلهم سكتو وبطلو مزايده وبصولي بنظرة المنتصر والراجل قالي مبروك ودفعت ومشيت، وروحت البيت لاقيتها طبعا بايظة ومفيهاش المميزات الي قال عنها😲”
- ومن هذه القصة البائسة احب اعلمك الدرس الخامس #فكر_بالمنطق_وخد_وقتك_في_التفكير
يعني مثلا ادي لنفسك فرصة اسبوع كامل للتفكير قبل اتخاذ القرار (في القرارات الكبيرة) او ساعة فالقرارات الصغيرة
كفايه كده قصص عشان المقال بقي طويل اوي، خليني اكملك الخطوات بشكل مختصر:
- القاعدة السادسه #استخدم_التأجيل يعني مثلا اطلب من الاطراف الاخري انك ترد بعد فترة عشان تدي لنفسك فرصة التحليل
– القاعدة السابعة #فكر_في_المستقبل يعني وانت بتفكر دايماً ادرس المكاسب والخساير المترتبة علي القرار ده سواء في المدى القريب او البعيد ،وقارن المميزات و العيوب.
– القاعدة الثامنة #اسئل_نفسك_سؤالين ايه سوأ حاجة ممكن تحصلك لو خدت القرار ده ؟! – واية احسن حاجة ممكن تحصلك لو خدت القرار دة ؟! ، وبناء علي الاجابات هاتعرف تاخد القرار دة او متاخدوش.
-القاعدة التاسعة #اتعلم_من_ماضيك_وماتندمش_علي_اللي_خسرتة ببساطه زي مابيقولو ان النجاح هو نتيجة مجموعة تجارب فاشله وعشان كده لازم تطلع بخبره من كل مره فشلت فيها وتستخدم الخبره دي في اي قرار في مستقبلك.
-القاعدة العاشرة والاخيرة الي احب اختملك بيها المقال ده #توكل_علي_الله، طالما انت عملت الي عليك واخدت بالاسباب وقرارك ده امر مشروع يبقي خلاص سيبها علي ربنا ومش هاتندم، زي مابيقولو الي معاه ربنا يمشي علي المايه.
وفي الختام اتمنالك دايما تاخد قرارت موزونه بدون تسرع، وان شاء الله ربي ييسرلكم الامور
تحياتي المدرب #احمد_جمعة
لقراءه المزيد من المقالات: www.mrAhmedGomaa.com
لو عجبك ماتنساش التفاعل share & like & comment
