ازاي تبان وماتبقاش بهتان؟!
تخيل كدة معايا لو انت ماشي في الشارع كان في مجموعة ناس قاعدة فرميت السلام ومحدش رد عليك…بعدها بفترة روحت مع واحد صاحبك يشتري حاجة واتصاحبت علي البياع وقت الشراء لكن بعد كم يوم روحت تشتري حاجة لنفسك من نفس البياع ولاقيته مش عارفك … وبدات تلاحظ كمان ان اهلك بدأو يهمشوك في قرارات تخص حياتكم المشتركة …وقصص تانية كتير نفس الحكايه.
تعالي بأه اخدك في رحلة ندردش فيها عن الموضوع دة..
بص ببساطة انت كانسان كامل مكمل مفيش حاجة نقصاك عشان تبقي ظاهر كدة وواضح في وسط الناس ، لكن مشكلتك الوحيدة هي انك سايب نفسك باهت ودبلان مش باين بوضوح في وسط الزحمة دي، يعني مثلا الناس الي مردوش عليك السلام علي الاغلب انت كان صوتك واطي او هم كانو مشغولين بحاجة فمسمعوش سلامك كويس، والبياع الي نساك هو مش متعمد يتجاهلك ولكن هو فعلا نسيك بحكم ضغط الشغل وكثرة الزباين غيرك، واهلك الي همشوك فأكيد ملقوش منك رجاحة في العقل او حكمة لما استشاروك قبل كدة او مساعدتهمش لما احتاجوك قبل كدة.
طب يامستر احمد اعمل اية عشان ابان ومبقاش بهتان؟
هابسطهالك انت عليك تعمل 4 حجات ممكن يفرقو معاك جدا:
- الاولانية ارفع مستوي كفائتك: سواء العقلية او المادية او الشخصية او ياي حاجة عندك كويسة لازم ترفع من كفائتك فيها، علي سبيل المثال:
لو انت قاعد في وسط ناس وبيتكلمو عن مثلا السيارات وانت قاعد ومعلوماتك بسيطة في السيارات هاتلاقي نفسك يا مبتشاركش يا بتقول كلام بسيط ومش واثق منة واكيد رئيك الي هاتقولة في السيارات محدش هايعمل بيه لانك مش عندك كفاءة ولا معلومات فيها ، والناس هاتديلك قيمة اكتر وتتاثر بيك اكتر لو لجئو ليك في مشورة وكان رأيك صح ومظبوت وبكدة هايكولنك كاريزما وتأثير من نوع المعلومة والحكمة، وهكذا كل ماتزود كفائتك في اي حاجة كويسة هاتزيد معاها كاريزمتك وتاثيرك في الناس حتي لو مش شايفينك. - التانية اهتم بمظهرك: عشان الناس هاتدي قيمة ليك اكتر لو مظهرك جذاب والجاذبية هنا مش معناها الوسامة خالص بالعكس الجاذبية ليها حجات كتير زي مثلا طريقة اللبس ولغة الجسد ونبرة الصوت وغيرها، يعني مثلا لو ماشي كويس وفارد جسمك ورافع راسك لفوق ولابس كويس وصوتك واضح ، هاتلاحظ ان بقيت مؤثر اكتر وليك كاريزما من النوع بتاع الشكل والمظهر، وطبعا الكاريزما من النوع دة مش هاتفيدك كتير الا لو عندك كاريزما المعلومة تكمل معاك، يعني ببساطة ياما ناس كان مظهرها فيه جاذبية واول ماتكلمو انطفت الكاريزما دي لانهم معندهمش معلومات ولا حاجة مفيدة ولا طريقة حلوة يقولو بيها.
- التالته اختار صحابك كويس: من فترة كدة كان ليا مجموعة اصدقاء كل ماقعد معاهم يقعدو يتكلمو عن الفشل والخسارة وان مفيش فرص في البلد وهكذا بعد فترة من الاحتكاك بيهم بدأت الاحظ اني كاره نفسي وحياتي ومش شايف اي فرصة ولا امل في اني ابقي كويس ، وطبعا الحالة دي اثرت علي سلوكياتي وتصرفاتي مع الناس الي حوليا وبقيت عصبي ومش طايق نفسي ،لحد مافهمت السبب وبدات اقلل من قعدتي معاهم لحد مابقيت تمام الحمد لله بمجرد ماغيرتهم باصدقاء تانيين محفزين ومشجعين وعندهم امل في الحياه، تخيل لو انت دلوقتي طالب في مدرسة وقاعد في التختة الاخيرة وجنبك واحد كل شوية يحدف ورقة علي المدرس، والمدرس اول ماتحدفت عليه راح عشان يعاقب الي حدف وطبعا ماعرفش مين الي عملها فالمدرس اكيد هايعاقب التخته كلها، ودة طبعا مش عشان انت عملت الغلط زي صحبك لكن انت شاركت فيه بسكوتك عنه او دعمك ليه من خلال ضحكك علي الي عملة مثلا، يعني اكيد انت لو غيرت صحابك الي مش تمام بناس تانية احسن هاتبقي انت كمان افضل زيهم.
- الرابعة تحمل المسئولية: من فترة كدة شوفت التليفزيون طفل صغير سايق عربية ابوة وواخد صحابة في عربية ووقفة شرطي المرور والولد غلط في الراجل وخبطة بالعربية، ورغم ذلك محصلش اي عقاب للطفل ولكن المفاجآه ان بعد فترة صغيرة الطفل كرر نفس الشئ وكان شارب مخدرات كمان .. شوف ببساطة لما الشخص مابيشيلش نتيجة الخطأ بيستسهل تكرارة، وبالتالي مش هايعرف يحسن من نفسة وهايكرر الاخطاء اكتر من مرة لانه مايعرفش غير كدة، وانت علشان تبقي دايما باين ومؤثر في الناس لازم تكون شخص مسئول بتعرف تتحمل مسئولية افعالك الكويسة والوحشة والا هاتفضل تغلط وتخسر كاريزمتك وسط الناس.
وفي الاخر ياصديقي اتمنالك دايما تكون لامع وساطع في وسط الناس
كل الود
المدرب #احمد_جمعة
